Sakinlərə zülm edən AAAF Park... - Günahı dövlət qurumunun üzərinə atır...


Xırdalan şəhərində yerləşən "AAAF Park" Yaşayış Kompleksində sakinlərə verilən elektrik enerjisi kəsilib.
Yeniavaz.com xəbər verir ki, sözügedən əraziyə gələn “Azərişıq” ASC-nin əməkdaşı sakinlərə verilən elektrik enerjisinin “AAAF Park” şirkətinin borcuna görə baş idarədən kəsildiyini bildirib. Sakinlər isə bildirirlər ki, onlar rəsmi olaraq “Azərişıq” ASC-nin abonentləridirlər və təbii qaz olmadığına görə hər ay orta hesabla 250-300 azn dövlət qurumuna elektrik məbləği ödəyirlər. Yəni “Azərişıq” ASC ilə “AAAF Park” arasındakı borc qalmaqalına görə, heç bir məsuliyyət daşımayan, vaxtlı-vaxtında sərf etdikləri elektrikin məbləğini ödəyən sakinlər əziyyət çəkirlər. Onlar bildirirlər ki, sözügedən binalarda təbii qaz da olmadığı üçün bu fəsildə onlar evi elektrik enerjisi ilə qızdırırlar. Elektrik enerjisi kəsildikdə isə bu, koronavirusa yoluxmanın kəskin artdığı bir dövrdə həm xəstələnmələ hallarının çoxalmasına, həm də onlayn tədris sisteminə qoşulan məktəblilərin dərsdən geri qalmasına səbəb olur. Sakinlər bildirirlər ki, elektrik enerjisinin kəsilməsi halları tez-tez baş verir.
Yaşayış kompleksinin sakinləri bildirirlər ki, sakini olduqları binaların elektrik təminatını rəsmi olaraq “Azərişıq” həyata keçirsə də, qurumun şikayət və müraciətlər şöbəsinin əməkdaşı Günel Qasımlı onlarla əlaqə saxlayaraq, problemlə bağlı MTK-ya(Mənzil-Tikinti Kooperativi), yəni “AAAF Park”a müraciət etmələrini istəyib.
Məsələ ilə bağlı “AAAF Park”dan Yeniavaz.com-a bildirildi ki, “Azərişıq” ASC şirkətin borcuna görə sakinlərin elektrik enerjisini kəsməklə vətəndaşları narahat etmək və şirkət rəhbərliyinə qarşı yönəltmək istəyir:
“AAAF Park Yaşayış Kompleksininin bəzi küçələrində elektrik enerjisinin verilişində fasilə yaranıb. Buna səbəb “Azərişıq” ASC-nin Kompleksə gələn xətti kəsərək təminatı dayandırmasıdır. Qurum bu addımı borcların yığılması və ödənilməməsinə görə atdığını bildirir və əsassız şəkildə şirkəti günahkar qismində göstərməyə çalışır.
Bildiririk ki, sakinlər məhz bu dövlət qurumunun abunəçiləridirlər, ödənişləri də o quruma edirlər. Ona görə də bu problemin bizə sirayət edilməsi, bizim ünvanımıza aid edilməsi doğru deyildir. Bunu vətəndaşları bu yolla narahat etmək və bizə qarşı yönəltmək cəhdi kimi qiymətləndirir və buna qəti şəkildə etiraz edirik!”
Məsələ ilə bağlı “Azərişıq” ASC ilə əlaqə saxladıq. Qurumun mətbuat katibi məsələni araşdırıb məlumat verəcəyini bildirsə də, bunu etmədi. Daha sonra məlumat almaq üçün etdiyimiz bütün zənglər isə cavasız qaldı.
Tarix: 16-12-2020, 16:38
Xəbəri paylaş


Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman

Sağlamlıq

Maraqlı

Maraqlı