Xətai rayonunda kommunal anarxiya: Natiq Məmmədov məsuliyyətdən yayınır - ÖZƏL

Xətai rayonunda kommunal anarxiya: Natiq Məmmədov məsuliyyətdən yayınır - ÖZƏL

Redaksiya olaraq Xətai rayonunun 27 saylı Mənzil-Kommunal İstismar Sahəsinin ərazisində ciddi problemlər barədə məlumat aldıqdan sonra məsələyə aydınlıq gətirmək üçün bu sahənin rəisi Natiq Məmmədovla əlaqə saxladıq. Lakin aldığımız cavablar bizi təəccübləndirdi və məyus etdi.

Ərazidə zibil tullantılarının həddən artıq çoxalması, qəbiristanlıq ətrafının zibilliyə çevrilməsi və yolun bağlanaraq qanunsuz tikinti aparılması ilə bağlı suallarımıza cavab vermək əvəzinə, Natiq Məmmədov kobud şəkildə "Siz kimsiniz?" sualını verdi. Mətbuat nümayəndələri olduğumuzu bildirdikdə isə "Nə edim ki? Gedin işinizlə məşğul olun" deyərək, sanki baş verənlərə heç bir aidiyyəti olmadığını göstərməyə çalışdı.

Xatırladaq ki, mənzil-kommunal istismar sahələrinin əsas vəzifələrindən biri ərazilərin təmizliyinə, abadlığına və qanunsuz fəaliyyətlərin qarşısının alınmasına nəzarət etməkdir. Lakin Natiq Məmmədovun yanaşması onun bu məsuliyyəti dərk etmədiyini və öz işinə laqeyd yanaşdığını açıq şəkildə göstərir.

Bundan əlavə, bizim bu mövzuda suallarımızı davam etdirdikdə, o, öz vəzifəsinə aid olan məsələlərdən yayınaraq "Mənim nömrəmi sizə kim verib?" sualı ilə əsas mövzudan uzaqlaşmağa çalışdı. Redaksiya olaraq nömrəni icra hakimiyyətindən əldə etdiyimizi bildirdikdə isə "İcra hakimiyyəti kimdir ki, mənim nömrəmi sizə paylayır? Məni narahat etməyin, gedin işinizlə məşğul olun" cavabını verdi.

Natiq Məmmədovun bu cür qeyri-peşəkar davranışı, icra hakimiyyətinin nüfuzuna hörmətsizliyi, dövlət idarələrinə qarşı sərgilədiyi saymazyana münasibət, eləcə də mətbuatın işini kiçiltməsi qəbuledilməzdir. Onun əsas vəzifəsi ona həvalə olunan ərazidə təmizlik və nizam-intizam yaratmaq olduğu halda, əksinə, öz məsuliyyətini boynundan atır, problemləri ört-basdır etməyə çalışır.

Redaksiya olaraq bildiririk ki, bu cür məsuliyyətsiz yanaşma və dövlət idarələrinə hörmətsiz münasibət heç bir halda yolverilməzdir. Qanunsuzluqlara, vəzifə öhdəliklərinin yerinə yetirilməməsinə və ictimai maraqların tapdanmasına göz yummayacağıq. Ümid edirik ki, aidiyyəti qurumlar bu məsələyə ciddi diqqət ayıracaq və Natiq Məmmədovun fəaliyyəti ilə bağlı lazımi tədbirlər görüləcəkdir.

 

Tarix: 8-02-2025, 18:31
Xəbəri paylaş


Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman

Sağlamlıq

Maraqlı

Maraqlı