Moskvanın “fiti” ilə Bakıda kimsə vacib məlumatları silir - ANLAŞILMAZ ALQORİTM

Moskvanın “fiti” ilə Bakıda kimsə vacib məlumatları silir
Azərbaycan Milli Məclisinin Sədri Sahibə Qafarova ilə Rusiyanın Xarici İşlər naziri Sergey Lavrov arasında ilk görüş qalmaqalsız ötüşmədi. İclasdan sonra Milli Məclis bir press-reliz yayımladı ki, orada xüsusi olaraq “Rusiya Federasiyasının Xarici İşlər naziri Sergey Lavrov, Milli Məclisin Sədri Sahibə Qafarovanın rəhbərlik etdiyi parlament nümayəndə heyəti ilə görüşündə Ermənistanın Baş naziri Nikol Paşinyanın açıqlamaları Dağlıq Qarabağla bağlı münaqişənin həlli prosesinə mane olur” fikirləri vurğulandı. Lavrov ayrıca, “bu, rəsmi Moskvanın mövqeyidir. Rusiya tərəfi problemin həlli prosesində işğal olunmuş 5 bölgənin geri qaytarılmasını, əraziyə sülhməramlıların yerləşdirilməsini və nəqliyyat və rabitə sisteminin bərpasını müdafiə edir”, - dedi.

Sonra ortaya Mariya Zaxarova çıxır və görüş zamanı “status məsələlərinin həlli müzakirə olunub” kimi birmənalı olmayan ifadələrdən istifadə edərək, bu açıqlamaları təkzib etməyə çalışır. Bundan sonra, Milli Məclisin mətbuat xidməti Lavrovla görüşdən sonra dərc edilmiş açıqlamanı dəyişdirir və bu da vəziyyəti daha da gərginləşdirir.

Azərbaycan tərəfini press-relizdə dəyişiklik etməyə sövq edən səbəbləri AYNA-ya şərh edən Azərbaycanın keçmiş Xarici İşlər naziri Tofiq Zülfüqarov dediyinə görə, ona məlumatlı mənbələrdən məlum olub ki, Lavrov yuxarıda göstərilən ifadələri həqiqətən söyləyib: “Üstəlik, bu ifadələr dolayı yolla Mariya Zaxarova tərəfindən də təsdiqləndi. Ancaq sonra, görünür, Rusiya tərəfinin istəyi ilə bütün bu ifadələr yalnız Milli Məclisin press-relizindən deyil, üstəlik mətbuatdan da silindi”.

“Bilmək istərdim ki, mətbuatımız nəyə və ya kimin göstərişinə əsasən işləyir? Birincisi, görüş zamanı deyilən sözlər niyə yayılmamalıdır? İkincisi, niyə Azərbaycan üçün maraqlı olan məlumatlarla manipulyasiya edilməsinə icazə verilir?”, - deyə sabiq nazir sual edib.

Zülfüqarov əlavə olaraq Lavrovun açıqlamalarında yeni bir şey olmadığını, bu mövqeyin ATƏT-in Minsk Qrupu tərəfindən çoxdan formalaşdığını da bildirib: “Nə üçün Azərbaycan ictimaiyyəti üçün maraqlı olan və ATƏT-in Minsk Qrupu sədrlərinin mövqeyini əks etdirən məsələlər press-relizdə dəyişdirilir? Bu, münaqişənin mərhələli həlli üçün məlum olan bir plandır: birinci mərhələdə ərazilərin bir hissəsi Azərbaycana qaytarılır, ikinci mərhələdə - qalan hissəsi, üçüncü mərhələdə - məcburi köçkünlər öz ərazilərinə qayıdırlar. 25 yaşı olan və Lavrovun iclasda səsləndirdiyi bu məlum mövqe – plan niyə mətbuatımızdan birdən-birə yox olur? Bu, nədir? Kimsə, ümumiyyətlə bu məsələdə hansı alqoritm üzərində işlədiyimizi izah edəcək?”.

Onun sözlərinə görə, bütün sənədlərdə işğal olunmuş ərazilərin qaytarılmasının vacibliyi göstərilir: “Ermənilər tərəfindən “ifşa edilən” “Madrid prinsipləri”ndə də məhz bu məqam qeyd edilir. Və niyə Moskvadan kiminsə bir "fiti" ilə burada kimsə ölkəmiz üçün bu qədər vacib məlumatları silir? Mənə elə gəlir ki, bütün bu baş verənlərdə "beşinci kolon" əlamətləri var. Çünki işğal olunmuş ərazilərin azad edilməsindən bütün uyğun tribunalarda bəhs etmək Azərbaycanın xarici siyasətinin ən vacib vəzifəsidir”.

Zülfüqarov hesab edir ki, Lavrovun sözügedən açıqlamaları rəsmi press-relizdən və yerli saytlardan çıxarılmamalı idi: “Tutaq ki, Rusiya tərəfi xahiş edib. Onlar bizdən, biz də onlardan çox şey xahiş edə bilərik. Məsələn, Ermənistana niyə hərbi ləvazimat daşıdıqlarının izahını. Onların bütün istəklərini “fərəqət” duruşu ilə yerinə yetirmək yolverilməzdir. Əgər Qarabağ probleminin mərhələli həllindən söhbət gedirsə, Mariya Zaxarova hansı "status məsələləri ilə bağlı qərarlar"dan danışır? Bəlkə, haradasa bizə paket həll planı təklif olunur? Bəlkə, həmsədrlərin belə bir mövqeyi var? Belə bir mövqe yoxdur!”.

Azərbaycan Respublikası Prezidentinin katibliyinin sabiq rəhbəri, politoloq Eldar Namazov da AYNA-ya deyib ki, ruslar öz açıqlamaları ilə "konyuktura diplomatiyasının ən pis ənənələrinə" uyğun olaraq, Azərbaycan nümayəndə heyətinin məlumatlarını şübhə altına alırlar: “Erməni mətbuatı danışıqlarda həm status məsələlərinin, həm də işğal olunmuş ərazilərin azad edilməsinin müzakirə olunduğunu yazır. Zaxarova ayrıca qarşı tərəfi deyil, onun məlumatlarına diqqət yetirməyi tövsiyə edərək, dolayısı ilə Azərbaycan tərəfini yalan danışmaqda günahlandırdı. Ancaq burada Mariya Zaxarova özü yalan danışır. Həqiqət bundan ibarətdir ki, münaqişənin həlli ilə bağlı son 10 ildə səsləndirilən təkliflər və bəyanatlar mərhələli həll sxemini nəzərdə tutub ki, bu da Dağlıq Qarabağın statusunun ilk mərhələdə müzakirə olunmaması deməkdir”.

Politoloqun fikrincə, Dağlıq Qarabağın statusu işğal olunmuş ərazilər azad edildikdən və qaçqınlar torpaqlarına qayıtdıqdan sonra müəyyənləşəcək: “Əslində, Maria Zaxarova “status məsələləri” formulası ilə çıxış etdiyi üçün burada erməni tərəfini aldadır. Söhbət yalnız, işğal altındakı torpaqlar azad edildikdən və qaçqınlar qayıtdıqdan sonra Qarabağa müvəqqəti status verilməsi ilə bağlı ola bilərdi”.

“Ancaq Zaxarova müvəqqəti statusdan danışmır, əvəzində qeyri-müəyyən ifadələr tapır. Beləliklə, o, ermənilərə Azərbaycan nümayəndə heyətinin münaqişənin həlli üçün paket variantı müzakirə etdiyini deyir. Hansı ki, bu variantın müzakirəsi prinsip etibarı ilə baş tuta bilməz”, - deyə Namazov fikrini yekunlaşdırıb.
Tarix: 25-09-2020, 20:45
Xəbəri paylaş


Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman

Sağlamlıq

Maraqlı

Maraqlı