Üçlü Bəyanat: Ankara niyə razı qaldı? - ŞƏRH



Türkiyə tarix boyu Qafqazda olub, bundan sonra da olacaq. Rəsmi Ankaranın regionda mövqelərini günü-gündən gücləndirməsi bizi sevindirən amildir.

Bu sözləri Axar.az-a siyasi ekspert Vüqar Zifəroğlu Türkiyənin Cənubi Qafqaz siyasəti və onun aspektləri haqda danışarkən deyib. O bildirib ki, Türkiyənin çoxəsrlik Cənubi Qafqaz siyasəti var:

“Ankara hər zaman Cənubi Qafqaza tarixi, etnik, dini və geosiyasi baxımdan həssas yanaşıb, bu bölgənin problemini öz problemi kimi qəbul edib. Bu, keçən əsrin əvvələrində də belə olub, indi də belədir və bundan sonra da belə olacaq. Mövcud vəziyyət Türkiyənin birmənalı şəkildə geosiyasi əhəmiyyətinin artmasının göstəricisi kimi qiymətləndirilə bilər. Ölkəmizin materik hissəsi ilə Naxçıvan arasında dəhlizin açılması son dərəcə önəmli, ciddi geosiyasi bir qələbə kimi qiymətləndirilməlidir. Bu, həm də Türkiyənin Azərbaycanla quru əlaqəsinin yaranması deməkdir. Bütövlükdə türk dünyası üçün böyük əhəmiyyət kəsb edir. Onsuz da tarix boyu Türkiyə Mərkəzi Asiya türkləri ilə birbaşa əlaqə qurmağa çalışıb. Bu gün də bu reallıq qalmaqdadır. Diqqət etsəniz, Türkiyə qəbul edilən üçtərəfli bəyanatdan razı qaldı. Bu belə özlüyündə rəsmi Ankaranın geosiyasi maraqlarından və bu istiqamətdə Azərbaycanla birgə addımlamağından irəli gəlir”.

Türkiyə ilə Rusiyanın münasibətlərindən danışan politoloq bildirib ki, bu, böyükmiqyaslı məsələdir:

“Bu münasibətlər özünü Suriyada, Liviyada və bir çox bölgələrdə göstərir. Hesab edirəm ki, hazırkı dönəmdə Türkiyə-Rusiya münasibətlərinin müsbət nəticələrini bütün tərəflər hiss edəcək. Tərəflər arasında qarşılıqlı etimadın olması çox mühüm faktdır. Regiona uzunmüddətli, davamlı sülhün gəlməsi üçün bu münasibətlərin möhkəmliyi önəmli bir nüans kimi qiymətləndirilə bilər”.
Tarix: 13-11-2020, 17:03
Xəbəri paylaş


Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman

Sağlamlıq

Maraqlı

Maraqlı