Qarabulağın adını qaytarmalıyıq - Yaxud məskunlaşma inhisardan çıxmalıdır


Dövlət Turizm Agentliyi bu dəfə Kəlbəcərin gəzməli-görməli yerləri haqda videosüjet hazırlayıb. Güman edirəm, süjet qanunsuz yollarla Kəlbəcərə getmək üstündə Murov dağlarında yaxalanan və Göygöl rayon məhkəməsinin qərarıyla 1 aylıq həbsə məhkum edilən idmançı-bloqqer Kamil Zeynallının ailəsinə acıq (qarabağlılar buna “yandıq vermək” deyirlər) vermək üçündür. Yoxsa bu dəqiqə hansısa turizmdən danışmağın mənası yoxdur. Dövlət baba hələ də bəyan edir ki, işğaldan azad olunan torpaqlara getməyin, əks halda partlayarsınız. Zəhmətkeşlərimiz də partlaya-partlaya Bakıda-Şəkidə oturub Qarabağın haçan minadan təmizlənəcəyini gözləməkdədir. Məlum deyil hansı partlamağımız müsbət haldır. Ən absurdu ora səfərlərin qanunsuz sayılmasıdır. Yəni, Kamil Zeynallının bu saat Şahbaz və Dilqəmə oxşadığını Göygöl məhkəməsinin o gülməşəkər hakimcikləri dərk eləmirmi?

Hərçənd, administrativ qərarlar olmayanda Azərbaycan xalqının yaşamaq hüququnu əldə etməsi də imkansızdır. Bizə gərək başçılıq edən olsun, müstəqil yaşamağımız alınmır. Odur, karantindən milçək kimi qırıldığımızı görən anda hökumət təzədən “esemesə” keçdi, nəticədə yoluxma sayı ikiqat azaldı. Hələ gözləyin, lap azalacaq. Camaat bir maskaya naz edirdi, indi ikisini üst-üstə taxır. Hərçənd, neçə gündür məni bir sual düşündürür: görəsən adamın mobil telefonu olmasa, küçəyə çıxmaq hüququnu necə əldə etməlidir? Düzdür, deyilər bilər ki, telefonu olmayan yoxdur. Mən buna şübhə etmirəm, sadəcə, qanuni absurdu diqqətinizə çatdırıram. Eyni zamanda, Hoperativ Qərargahın keçən dəfələrdə elədiyim şikayətə hələ baxmadığını açıqlayıram: idman məqsədiylə, yaxınlığında kimsə olmayan ərazidə qaçışla məşğul olan adamların maska taxması nədən zəruridir? Sizə bekarçılıq mənasında verilən sual kimi görünməsin. Polisin qaçan adamın ardıyca düşüb “Maska tax, yoxsa cərimə olunacaqsan” deməsinə şahidəm. Bu axı tam absurd durumdur.

Hörmətli səlahiyyəti zatlar yazımızın içində ikən onlara bir təklifimi çatdırmalıyam. Bu təklif işğaldan azad edilən Füzuli rayonuyla, daha doğrusu, onun adıyla bağlıdır.

Füzuli şəhərinin qədim adı Qarabulaq olub. Şair Məhəmməd Füzulinin bu rayonda yaşayıb-yaratması hər hansı mənbələrdə təsdiqlənmir. O zaman niyə biz ərazinin toponimini dəyişmişik? Bunu sovetlər zamanı ediblər. Gəlin tarixi ədaləti bərpa edək, ən azı Füzuli şəhəri öz Qarabulaq adına qayıtsın. Üstəlik “füzuli” söz olaraq yaxşı mənalı söz deyil, ərəbcə “boşboğazlıq, lüzumsuzluq” anlamı verir. Şamaxının Saqiyan kəndini Günəşli-yə döndərən deputatxana buna da baxsın.

Bəlkə şəhəri dəyişib, rayonu Füzuli adıyla saxlamaq olar, hərçənd, onu da tarixi adına – Cavanşir adına çevirmək yaxşı olardı, çünki bu bölgənin türk elləri Cavanşir adıyla tanınıblar, Qarabağ xanı Pənahəli xan Cavanşir də o tayfaya mənsub imiş. Həmçinin, tarixi Arasbar adını rayona qoymaq olar. Şair Füzulinin adını yaşatmaq çox vacibdirsə, bunu başqa üsullarla edə bilərik. Məsələn, kitablarını oxumaqla. Kitab oxumaqla isə bizim o qədər də aramız yoxdur. Elə az oxuduğumuz üçün bu saat hər cür ara həkimləri, aptek dəllalları başımıza corab hörür, mənası olmayan dərmanları, plaseboları xalqa “koronadan mühafizə sistemi” adıyla sırıyır.

Qayıdaq Qarabağa. Həm mövzu, həm coğrafi baxımdan.

Dünən Şuşada ilk qənnadı dükanının açılması xəbərini gördüm. Yaxşı haldır. Bunun bütün azad edilən ərazilərimizdə tezliklə həyata keçməsini arzulayırıq. Hökumət bunun üçün xalqa ora qayıtmaqda minimal yardımını etsə bəsdir. Biz o yerlərə ən qısa müddətdə qayıtmalıyıq. Yurdlarımızdan insan səsi gəlməlidir. Yoxsa haçana qədər MN-in “Filan kəndin görüntüləri” adlı qorxunc sükutlu videolarını izləməliyik? Bu nə formatdı, siz Allah? Bunu kim fikirləşib? Mülki əhali yoxdur, barı əsgərlərimizin səsini verin. Nə bilim, bir quşun oxumağını tapın, səsini yayın. Küləyin, suyun səsini verin. Yoxsa iki aydır MN azad edilən torpaqlarımızdan ancaq “bir dəqiqəlik sükut” reportajları yayır. Sanki matəm yaşayırıq.

Minaların təmizlənməsi işinə yerli əhali cəlb edilməlidir. Köhnə döyüşçülər, qazilər var, uzun illər bizim istehkamçı bölüklərdə xidmət keçmiş minlərlə ehtiyatda olan əsgərimiz var. Onları dəvət edin, qısa müddətə hər yeri təmizləyəcəklər.

Zamin HACI
Tarix: 21-12-2020, 13:02
Xəbəri paylaş


Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman

Sağlamlıq

Maraqlı

Maraqlı