Çarpayılar və dərman satılır, vaksin oyunu gedir, TƏBİB isə mürgüləyir - Ölkədə korona bazarı


Azərbaycanda əhali bilmir ki, koronavirusla, yoxsa ondan daha təhlükəli olan rüşvətxorluqla mübarizə aparsın. İndi səhiyyə mafiozları bu iki xəstəliyin sintezini də yaradıblar və hazırda infeksiya üzərindən böyük pullar dövr edir: bura çarpayıların azlığı bəhanə edilərək yerlərin xəstə yaxınlarına satılmasından tutmuş dərmanların fantastik qiymətlərinə qədər bir “korona paketi” daxildir.
Dəhşətli və əcaib mənzərə odur ki, dünyanın heç bir ölkəsində pandemiya ilə mübarizə korrupsiya elementinə çevrilməyib. Ən azı bu məsələdə üçüncü dünya ölkələri belə vicdansızlığa yol vermirlər və anlayırlar ki, bəşəriyyət üçün bir bəla gəlib, xalqı xəstəlikdən qurtarmaq, maksimum az itki ilə pandemiyadan xilas olmaq lazımdır.
Anaxeber.info-ya gələn məlumatlar, sosial şəbəkədə yayılan informasiyalar, o cümlədən mötəbər KİV-lərdə dərc olunan xəbərlər belə deməyə əsas verir ki, Azərbaycanda koronavirus alver predmetinə çevrilib, bundan varlananlar var və bu biznesin başında duranların ifşası üçün TƏBİB-lə Səhiyyə Nazirliyi tərəfindən heç bir addım atılmır.
Buradan iki nəticə çıxarmaq mümkündür: ya elə sözügedən qurumlarda vəzifəli şəxslər həmin rüşvətin, bazarın başında dayanıb, ya da TƏBİB və Səhiyyə Nazirliyi yarıtmaz, bacarıqsız, səriştəsiz, laqeyd fəaliyyət göstərirlər.
Bəs soruşula bilər ki, virusla mübarizədə özbaşınalıqlar konkret olaraq nədən ibarətdir. İlk növbədə yoluxmaların artdığı zamanda bəzi modul tipli xəstəxanalar çarpayıların azaldığını bəhanə gətirməyə başlayırlar.
Bu zaman xəstə yaxınları məcbur olaraq “makler” tapmağa, xəstəsini yerləşdirmək üçün danışıq aparmağa çalışır. Və nəticədə xəstə yaxını 1500-2000, bəzi hallarda 3000 manat verərək palatada yer ala bilir. Deməli, çarpayı yeri az deyilmiş, sadəcə virusdan da pul qazanan əqidəsizlər var. İddialara görə, belə hallar FHN-ə məxsus Zığdakı modul tipli xəstəxanada yaşanıb. Sosial şəbəkələrdə yazılanlardan və ayrı-ayrı insanların söhbətlərindən məlum olub ki, 1500-2000 manat rüşvət verməklə xəstəni yerləşdirirlər.
Həmçinin xəstə müalicə aldığı günlərdə ona qulluq edən tibb işçilərinə “hörmət” etməyəndə lazımı qayğı göstərilmədiyi deyilir. Məsələn, oksigen aparatına qoşulan xəstənin boğazı tez-tez quruyur, mayeyə ehtiyacı yaranır, amma onları vaxtı-vaxtında su damcısı ilə təmin etmirlər.
Bu məlumatlar faktiki olaraq xalq içində dolaşır və nə TƏBİB, nə rəhbəri Ramin Bayramlı, nə Səhiyyə Nazirliyi, nə onun pandemiya dövründə qəhətə çıxan rəhbəri Oqtay Şirəliyev təftiş aparırlar.
Eyni zamanda, dərmanların fantastik qiymətə satışında açıq bazar ounu gedir. Halbuki həmin dərmanları dövlət alaraq ölkəyə gətirir və vətəndaşın müalicəsi üçün təmənnasız olaraq, istifadəyə buraxır.
Deyəsən, “qara maskalı” oğlanın səhiyyə sektorunda da görünməsinə zərurət yetişir. Çünki əhalinin pandemiya dövründə maddi vəziyyətinin çətinləşdiyi zamanda, xəstəliyin tüğyan etdiyi dövrdə faşist münasibət sərgiləmək, pulu olmayanı çölə atmaq, müalicə etməmək bağışlanmaz cinayətdir. Ancaq məsələ bu tənqidlərlə həll olmur, TƏBİB rəhbərliyi hara baxır? Nə üçün modul tipli xəstəxanalarda yoluxmuş xəstələrin yerləşdirilməsinin 2000-3000 manat rüşvətlə olduğunu araşdırmır?
R.Bayramlı pandemiyanın ilk vaxtlarında Operativ Qərargahın brifinqlərində bir-iki dəfə göründükdən sonra qeybə çəkilib. Hərçənd, hər gün canlı yayıma çıxmalı, xalqa hesabat verməli, epidemiyanın tempi, bizi gözləyən təhlükələr, qarşıda dördüncü dalğanın olub-olmayacağı, vətəndaların şikayət və narazılıqları, dərmanların satılması və s. suallara cavab, izahat verməlidir. Bunu da Prezident etməlidir?
Anaxeber.info bildirir ki, başqa bir iddialar vaksinlərin vurulması prosedurunda rüşvətin ayaq açmasıdır. Belə məlumatlar gəzir ki, peyvənd olunmaq istəməyən vətəndaşlar poliklinikalarda həkimə, yaxud tibb bacısına pul verməklə bu prosesdən yayınır, vərəqədə isə onun vaksin edildiyi qeyd olunur.
Əgər bu cür cinayətlərə yol verilirsə, mütləq şəkildə hüquq-mühafizə orqanları araşdırma aparmalıdırlar. Lakin ondan əvvəl TƏBİB və Səhiyyə Nazirliyi bu iddiaları yoxlamalı, neqativləri aradan qaldırmalıdır. Hər halda belə iddialar meydana çıxıbsa, “od olmayan yerdən tüstü çıxmaz” deməkdir və R.Bayramlı “Yalandır” söyləməklə bundan boyun qaçıra bilməz.
Eynilə testlərin götürülməsində yanlış nəticələr də ciddi narazılıq yaratmaqdadır. Elə bu günlərdə Ağ partiya sədri Tural Abbaslının bir testində pozitiv, digər testində neqativ çıxmışdı. TƏBİB rəhbərliyi bu məsələlərə aydınlıq gətirməlidir.
Ümumiyyətlə, Azərbaycanın səhiyyə sisteminin çoxdan qanqrena olduğu, can verdiyi haqda yazmışıq. Sadəcə, pandemiya dövründə bu eybəcərliklər daha da qabarıq şəkildə üzə çıxdı.
Əslində heyrətamiz reallıqdır ki, səhiyyəsi təpədən-dırnağa qədər rüşvət çirkabına bulaşmış ölkədə pandemiya ilə necə mübarizə apara bilirik.
Bunun üzərinə yarıtmaz idarəçilər, mafioz şəbəkələr, etimadı doğrulda bilməyən TƏBİB və bivec Səhiyyə Nazirliyi gələndə daha fəlakətli dekorasiya yaranır.
Yeri gəlmişkən, musavat.com da koronavirus biznesi ilə bağlı ciddi iddialar yazıb və görünür ki, heç də deyilənlər əsassız deyil, artıq media həyəcan təbili çalmağa başlayır. Sayt yazır ki, səhiyyə sisteminin içində oluşan gizli bir şəbəkə pandemiyanın tüğyan etdiyi zamanlarda (indi də həmin zamandır) ixtisaslaşmış xəstəxanalardakı məhdud yerləri rüşvət müqabilində ağır xəstələrin yaxınlarına satırlar! Xəstələr çox olduğu üçün, önəmli və daha modern xəstəxanalarda, modul tipli müəssisələrdə yer məhdudiyyəti yaranır. Deməli, mürgüləyən TƏBİB və rəhbərliyi “qış yuxusundan” ayılsa, epidemiyanın yaz dalğasında nələr baş verdiyini anlayar.
Anaxeber.info
Tarix: 22-04-2021, 10:29
Xəbəri paylaş


Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman

Sağlamlıq

Maraqlı

Maraqlı