“Yeni bahalaşma dalğası gəlir” - NƏ BAŞ VERİR?


Son günlər bazar və marketlərdə qiymət artımı müşahidə olunur. Bahalaşma özünü əsasən ərzaq və kənd təsərrüfatı məhsullarında göstərir. Əvvəllər 65-70 qəpiyə satılan yerli kartof 80 qəpiyə, soğan isə 85-90 qəpiyə qədər artıb. Bəzi yerlərdə soğanın qiyməti 1 manata qədər yüksəlib. Unun da qiyməti artıb. Əvvəllər 50 kq-lıq un kisəsi 27 manata satılırdısa, indi qiymət 32-33 manat olub. Bu səbəbdən bəzi marketlərdə çörəyin də qiyməti bahalaşıb.

Əvvəllər 50 qəpiyə satılan çörək indi 53-55 qəpiyə satılır. Supermatketlərdə şəhər yumurtası 18, kənd yumurtası isə 30-35 qəpiyə bazarlanır.
Digər gündəlik tələbat məhsullarında, o cümlədən şəkərin və qəndin qiymətində də artım var. 90 qəpiyə satılan şəkər tozunun 1 kiloqramı indi 1 manatdır.

Məlumdur ki, yanvarın 5-dən Aİ-92 markalı benzininin və dizelin qiymətləri ilə bağlı yeni tariflər tətbiq edildi. Benzin 90 qəpikdən 1manata, dizel isə 60 qəpikdən 80 qəpiyə qalxdı.

Bu dəyişiklikdən sui-istifadəyə və əsassız qiymət artımına yol verilməsinin vaxtında müəyyənləşdirilməsi və qarşısının alınması məqsədi ilə İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti tərəfindən xəbərdarlıq edildi.

Rəsmi qurum bəyan etdi ki, nəzarət tədbirləri zamanı qanun pozuntusu halları aşkar edilərsə, qanunvericilikdə nəzərdə tutulmuş ciddi məsuliyyət tədbirləri görüləcək. Görünən odur ki, edilən xəbərdarlıqların hər hansı bir təsiri yoxdur.

Mövcud durumu “Sherg.az”a şərh edən iqtisadçı-ekspert Natiq Cəfərli bildirib ki, ərzaq məhsullarındakı kəskin qiymət artımı son zamanlar qəbul edilən qərarlarla bağlıdır:

“Dizel yanacağının bahalaşması logistikanı, yəni daşınma xərclərini artırıb. Ona görə də qiymət artımını müşahidə edirik. Təəssüf ki, yeni mövsüm başalayanda kənd təsərrüfatı məhsullarında da bahalaşmanın növbəti dalğasını görəcəyik. Çünki kənd təsərrüfatı məhsullarının istehsalında maya dəyərinin 30 faizdən çoxunu dizel yanacağı təşkil edir. Maya dəyəri artıqca təbii ki, bahalaşmanı da müşahidə edəcəyik”.

İqtisadçının sözlərinə görə, Novruz bayramına qədər qiymətlərin sabitləşməsini gözləmək bir az çətindir:

“Bayrama qədər məhsulların bahalaşmasını görəcəyik. Təəssüf ki, yeni dizel qiymətləri və daşınma xərcləri qiymətlərdə öz əksini tam tapana qədər ərzaq məhsullarında artım olacaq. Novruz bayramından sonra da yerli kənd təsərrüfatı məhsullarında bahalaşmanın şahidi olacağıq”.
Tarix: 21-01-2021, 21:30
Xəbəri paylaş


Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman

Sağlamlıq

Maraqlı

Maraqlı