Moskvada gizli şəbəkə erməniləri revanşa hazırlayır - üç müşketyor kimdir?


44 günlük müharibədən sonra Rusiyadakı erməni diasporu aldığı sarsıdıcı ağır zərbələrdən hələ özünə gələ bilmir. Amma məkrli siyasətini davam etdirməkdən də imtina etməyiblər.

“Yeni Müsavat”ın verdiyi xəbərə görə, onların xüsusən üç fəal üzvü - “Russia Today” telekanalının direktoru Marqarita Simonyan, əri - rejissor və aparıcı Tiqran Keosayan və “Danışır Moskva” radiostansiyasının baş redaktoru, bakılı erməni Roman Babayan erməniləri fəal şəkildə revanşa hazırlayırlar.

Hər üçünün Rusiya televiziyalarına və informasiya məkanına çıxışları olduqca genişdir. Bu qızışdırıcı təbliğatı hərdən hətta erməniləri aşağılamaqla, onları məğlubiyyətə görə günahlandırmaqla icra edirlər. Bu hiyləgər gedişlər, erməniləri riqqətə gətirmək və qisasa çağırış çıxışlarını Rusiya dövlətinin efir məkanı üzərindən və ya sosial şəbəkədən həyata keçirirlər.

Digər erməni politoloqları da bu işlərdə fəal iştirak edirlər. Baxmayaraq ki, Azərbaycan müharibəni udub, torpaqlarını işğaldan azad edib, hazırda hibrid müharibə mərhələsi daha ciddi xarakter almaqdadır. Bu işin əsas ağırlığını isə indi Moskvadan da narazı olduğunu gizlətməyən Rusiyadakı erməni diasporu yerinə yetirir. Qarşılığında isə Azərbaycanın Rusiyadakı diasporu kifayət qədər geriləyib. Onsuz da dağınıq durumdaydı, teleməkana ermənilərdən fərqli olaraq çıxış imkanlarımız ya yoxdur, ya da çox məhduddur, indi isə simonyanlar “meydan sulayır”.

Bəs bu üç gizli erməni diaspor liderləri ilə necə mübarizə aparmalı, öz diasporamızın fəaliyyətini necə gücləndirməliyik? Ermənilərə yeni “dəmir yumruq” vəd edən bu ziyanlı təbliğatı hansı şəkildə durdurmalıyıq?

Moskva Azərbaycanlıları İcmasının sədri Şamil Tağıyev “Yeni Müsavat”a danışarkən qeyd etdi ki, Rusiyanın aparıcı mətbuat orqanları demək olar, erməni lobbisinin kontrolundadır. Onun sözlərinə görə, həmin şəxslərdən biri Artşes Qabrelyandır və “İzvestiya” qəzetinin sahibidir, “Life News” də onun əlindədir: “Tək adıçəkilən üç adamla iş bitmir, siyahı daha genişdir. Sadəcə, onlar təkcə revanş yox, anti-Paşinyan kampaniyasına qoşulublar. Guya erməni millətinə əvvəldən izah edirdilər ki, Paşinyan hakimiyyətə gəlsə, torpaqları qaytaracaq və bu proqnozları da indi ”doğrulub". Revanş xəyalları ilə yaşayan əsas Artşes Qabrelyanın özüdür. O, müharibə arzularını teleməkanları ilə çatdırır. Adıçəkilən şəxslərin də diaspora ilə ciddi əlaqəsi yoxdur, erməni lobbiləridir".

Ş.Tağıyev bildirdi ki, müharibədən sonra erməni diasporasında qovğa başlayıb: “Paşinyandan sonra Rusiyada Erməni Federal Təşkilatı yarandı. Əvvəl Rusiya Erməni İttifaqı var idi. İndi bu iki qurum arasında qırğınlar başlayıb. Rusiya Erməni İttifaqı rəhbərliyi erməni diasporunun birlik əldə etməməsinin səbəbini Ermənistana göndərilən yardımların hara getməsində, necə çatmasında görür. Amma mətbuat sahəsində ermənilər güclüdürlər, alternativ platforma yoxdur ki, oraya çıxa bilək. Bu da ondan irəli gəlir ki, Rusiyada mediada zəifik, bu sahədə iş aparılmır. Rusiyadakı əksər azərbaycanlılar həyatın inkişafını iqtisadi inkişafda görürlər. Yəni bazarlar, ticarət mərkəzləri açılsın, amma media və yaxud televiziya açmaq haqda fikirləşmirlər”.

Moskva Azərbaycanlıları İcmasının sədri söylədi ki, 44 günlük müharibədə də Rusiyadakı azərbaycanlılar arasında təşkilatlanma olmadı: “Hansısa diaspora tərəfindən idarə olunmadı, sadəcə, şəxsi təşəbbüslərlə efirə çıxırdıq, teleqram kanallarda fəal olurduq, ancaq bu da çox uğurlu alındı. İmkanlı azərbaycanlılar istəsə, Rusiyada media təsis edə bilər. Düzdür, Rusiyanın öz daxili siyasəti var, hər şey etmək olmur. Amma iki dövlət arasında danışıqlar aparılsa, razılaşma olsa, burada bizi təmsil edən media orqanı fəaliyyətə başlaya bilər. Məsələn, ”Sputnik"in Azərbaycanda nümayəndəliyi var. Azərbaycanın da informasiya mərkəzinin Rusiyada təmsilçiliyi pis olmazdı".

Politoloq Qabil Hüseynlinin sözlərinə görə, Simonyan Rusiyada məsul vəzifə tutur, Rusiya televiziyasının baş direktorudur. “O, Putinə yaxın dairələrin adamı hesab olunur. Əlinə düşən fürsətdən istifadə edərək öz xalqının lehinə pozucu, faşist və şovinist təbliğat aparır. Azərbaycan Xarici İşlər Nazirliyi də Rusiyaya məktub göndərə bilər ki, ermənilər işlədikləri yerdə dövlətin pulu hesabına öz təbliğatlarını qurublar, Simonyan efiri qızışdırıcı təbliğat yerinə çevirib, bunun qarşısı alınmalıdır”, - deyə ekspert vurğuladı.

Q.Hüseynlinin fikrincə, Rusiyada televiziyaların əksəriyyəti, “Dojd” istisna olmaqla, Putinə yaxın dairələri təmsil edir: “Həmin telekanallarda təkcə Simonyan və əri deyil, digər faşist əhval-ruhiyyəli ermənilər işləyirlər. Onlar əslində Rusiyanın və Prezidentin strateji maraqlarına xidmət etmək əvəzinə, efir vaxtının 30-40 faizini erməniliyə, Azərbaycana qarşı böhtan, iftira kampaniyasına sərf edirlər, millətlərarası münasibətləri qızışdırırlar. Halbuki qanuna görə, KİV-də nifaq salmaq, qızışdırıcı hərəkətlərə yol vermək cinayət fəaliyyəti sayılır. Və bu da Rusiya siyasi dairələrinin maraqlarına xidmət etmir. Nəticədə Rusiyanın postsovet məkanında nüfuzuna ciddi zərbə endirir”.

Politoloq hesab edir ki, Rusiyada azərbaycanlılar siyasətlə çox da maraqlanmırlar: “Politoloqlarımız var, tərəfdarımız olan rus ekspertlər az deyil, amma efir erməni şovinistlərin inhisarında olduğu üçün ora düşmək çətin olur. Amma görünür, internet televiziya resurslarından istifadə etməliyik. Kuznetsov internet TV yaradıb, Korotçenko üçün də açılmasına nail olmalıyıq. Bir sözlə, əgər telekanallara çıxış imkanı məhduddursa, Rusiya efir məkanına internet TV ilə girmək lazımdır”.
“Yeni Müsavat”
Tarix: 17-02-2021, 08:52
Xəbəri paylaş


Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman

Sağlamlıq

Maraqlı

Maraqlı