Qarabağ savaşı: NATO kimi dəstəkləyir? - GƏLİŞMƏ



NATO rəhbərliyi Dağlıq Qarabağ probleminə münasibətdə Ermənistanı məyus edib. Ermənistan Prezidenti Armen Sarkisyanın NATO-nun Azərbaycanın keçirdiyi hərbi əməliyyatların qarşısını almaq və rəsmi Bakıya dəstək verən Türkiyəyə təzyiq göstərmək barədə xahişi qəbul olunmayıb. NATO-nun Baş katibi Yens Stoltenberq və Ermənistan Prezidenti Armen Sarkisyan Brüsseldə NATO qərargahındakı görüşündən sonra rəsmi İrəvanın təklifi açıq şəkildə rədd edilib. Yens Stoltenberq Qarabağ münaqişəsindən danışarkən deyib:

“Cənab prezidentə NATO-nun bu döyüşlərin bir parçası olmadığını xatırlatdım. Azərbaycan da, Ermənistan da 25 ildən artıq müddətdir ki, NATO-nun dəyərli ortaqlarıdır”.

Baş katib Azərbaycan rəhbərliyi ilə görüşməyə hazır olub-olmadığı barədə jurnalistlərin sualını da cavablandırıb: “Dediyim kimi, hər iki ölkə NATO-nun hörmətli tərəfdaşlarıdır. Tərəfdaş dövlətin başçısı Brüsselə gələrək görüş istədikdə, mənim üçün belə bir görüşün keçirilməsi təbiidir. Azərbaycan Prezidenti İlham Əliyevin səfərinə daha əvvəl ev sahibliyi etdik və onunla yenidən danışmağa hazıram. Ermənistan və Azərbaycan rəhbərləri də daxil olmaqla, müxtəlif tərəfdaş ölkələrin liderləri ilə görüşəndə bu tərəfdaşlığımızın bir hissəsidir. Bu yaxınlarda Ermənistan Prezidenti ilə görüşdüm və belə bir görüş üçün bir müraciət olarsa, Azərbaycan Prezidenti ilə görüş keçirəcəyəm”.

O bir daha qeyd edib ki, NATO Dağlıq Qarabağ münaqişəsinin bir hissəsi deyil. Bununla yanaşı, Türkiyə NATO üzrə vacib müttəfiqdir və Alyansın rəhbəri bu mövqeyi Ermənistan Prezidentinin diqqətinə çatdırıb. NATO-nun atəşkəsin pozulması səbəbilə narahat olduğunu vurğulayan Yens Stoltenberq anlaşılmazlıqların bitməsi və sülh yolu ilə həllini tapılmasının vacibliyini qeyd edib.

“Dinc əhalinin hədəf seçilməsi qəbuledilməzdir və dərhal dayandırılmalıdır. Hər kəs daimi bir siyasi həll üçün çalışmalıdır. Ermənistan və Azərbaycan müzakirələrə davam etməlidirlər”, - deyə Baş katib bildirib.

O, NATO-nun ATƏT-in Minsk Qrupu həmsədrlərinin səylərini dəstəklədiyini qeyd edib və ABŞ-da iki ölkənin xarici işlər nazirləri arasında görüşün keçiriləcəyini alqışladıqlarını vurğulayıb.

Politoloq Məhəmməd Əsədullazadə hesab edir ki, NATO bu məsələdə strateji tərəfdaşı olan Türkiyənin maraqlarına qarşı zidd getməməyi üstün tutub.

“Ermənistanın Prezidenti Armen Sarkisyanın Azərbaycan və Türkiyədən şikayətçi olaraq NATO Baş katibi ilə görüşməsi və narazılığını bildirməsi, xüsusilə dəstək istəməsi göründüyü kimi mümkün olmadı. İlk növbədə, NATO prosesləri Minsk Qrupu çərçivəsində həllinə dəstək verir. Buna baxmayaraq, NATO prosesdən kənar qalmayıb və siyasi mövqeyini daima ərazi bütövlüyü çərçivəsində qeyd edib. Ona görə də Sarkisyanın Brüsseldə Azərbaycana qarşı mənfi siyasi gediş etməsi mümkün deyildi. Ümumiyyətlə, Türkiyənin fəaliyyətindən narazi olması bu Yerevanın öz planıdır. Düşünürəm ki, regionda Türkiyənin mövqəyinin güclənməsi əsasən NATO maraqlarına cavab verir. Hesab edirəm ki, Türkiyənin NATO üçün strateji əhəmiyyəti var. Bu baxımdan, NATO Ermənistana görə Türkiyəni qurban verə bilməz. Ermənistan Rusiyanın forpostudur və uzun illərdi ki, NATO-ya qarşı ərazisində hərbi bazalar var. Belə olan təqdirdə, NATO Qarabağ və Türkiyə məsələsində Ermənistana dəstək verməyəcək”.
Tarix: 26-10-2020, 08:52
Xəbəri paylaş


Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman

Sağlamlıq

Maraqlı

Maraqlı