Professor: “AB və NATO-nun dağılma ehtimalı yoxdur, BMT isə...”

Professor: “AB və NATO-nun dağılma ehtimalı yoxdur, BMT isə...”

“İndi daha çox Avropa Birliyi üçün dağılma prosesinin labud olduğunu deyirlər və bu zaman Böyük Britaniyanın bu birlikdən çıxmasını fakt kimi göstərirlər. Mən hesab etmirəm ki, Avropa Birliyi dağılacaq. Əksinə, qurum öz siyasi və iqtisadi üstünlüyünü təcrübədə göstərən birlikdir. Dövlətlər bu birliyin hesabına inkişaf ediblər, iqtisadi çiçəklənməyə nail olublar. Bu gün pandemiya məsələsində tam həmrəylik göstərməsələr də, fakt odur ki, bir-birlərinə köməklik edirlər”.

Bu fikirləri professor Qabil Hüseynli Reyting.az-a pandemiyadan sonra beynəlxalq qurumların və ittifaqların dağılma ehimalı haqqında danışarkən deyib.

Onun sözlərinə görə, Avropa Birliyi (AB) kimi NATO-nun da dağılma ehtimalı sıfıra bərabərdir.

Q. Hüseynli bildirib ki, vaxtilə Avropa Birliyi NATO-dan ayrı silahlı qüvvələrini yaratmaq istəyirdi: “Amma sonradan gördülər ki, bu addım NATO-da parçalanmaya səbəb ola bilər və həm də böyük maliyyə lazımdır”.

Politoloq əlavə edib ki, NATO praktikada özünü doğruldan təşkilatdır: “NATO-nun xərclərinin böyük hissəsini ABŞ üzərinə götürüb. Tramp hakimiyyətə gəldikdən sonra bəzi ölkələr NATO-ya üzvlük haqqını artırıb. İndi NATO dünyada siyasi-hərbi tarazlığı təmin etmək üçün yeganə təşkilatdır və onun pandmiyadan təsirlənərək parçalanma ehtimalı yoxdur”.

Q. Hüseynli qeyd edib ki, AB və NATO-dan fərqli olaraq BMT müasir zamanla ayaqlaşa bilmir: “BMT-nin yenidən qurulmasına ehtiyac var. BMT Təhlükəsizlik Şurasının 5 daimi üzvü dünya haqqında qərarlara istiqamət verirlər. Onlardan biri BMT-nin qrarı ilə bağlı veto tətbiq edirsə, bu zaman həmin qərar icra edilmir. Odur ki, “Dünya 5-dən böyükdür”,- sözü həqiqətdir. Artıq BMT-də islahatların aparılması, xüsusilə Təhlükəsizlik Şurasının üzvləri məsələsinə yenidən baxılması və tərkibinin 15-ə çatdırılması haqda müzakirələr var. Almaniya, Braziliya, Yaponiya, Türkiyə və digər ölkələrin Təhlükəsizlik Şurasına birdəfəlik üzv daxil edilməsi kimi fikirlər də səslənir. Həmçinin, BMT-nin ildə bir dəfə çağırılan daimi sessiyasının səlahiyyətlərinin artırılması məsələsi də gündəmdədir. Belə fikirlər var ki, Təhlükəsizlik Şurasının qəbul etdiyi qərarlar BMT Baş Məclisinin illik sessiyasında təsdiq edilməlidir”.
Tarix: 4-05-2020, 13:18
Xəbəri paylaş


Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman

Sağlamlıq

Maraqlı

Maraqlı