Dövlət Turizm Agentliyinin 2 milyonluq xərci müzakirə yaratdı - Nə üçündür?

Məlum olduğu kimi, Dövlət Turizm Agentliyi (DTA) xarici jurnalistlər, blogerlər və turizm şirkətləri üçün Azərbaycanla tanışlıq səfərlərinin təşkili xidmətlərinə təqribən 2 milyona yaxın vəsait xərcləyəcək. Bu isə sosial şəbəkələrdə müzakirələrə səbəb olub.

AXS.az bildirir ki, mövzu ilə bağlı açıqlama verən Ağ Partiyanın sədri Tural Abbaslının sözlərinə görə, bu dünya praktikasında da tətbiq olunur. 

O bildirib ki, cəmiyyət belə maliyyə xərclənməsinin şəffaf olacağına inanmır: “Dünyada adətən izləyici sayı olan, bu kontentdən çıxış edən, turistik sahədə çıxış edən blogerlərə müxtəlif dövlətlər öz ölkələrini tanıtmaq üçün sifarişlər, qrantlar verirlər. Amma bizdə məsələ odur ki, dövlət qurumlarında bu məsələlərdə o qədər yeyintilər olub ki, insanlar artıq belə qrantların şəffaf olacağına inanmırlar.

Sərhədlərin bağlı olduğu zamanda bu qədər vəsaiti kimlərəsə vermək, “Bizim dövlətin turistik məkanlarını təbliğ et demək” inandırıcı deyil. Çünki turistlər əsasən biletləri ucuz olan, hotelləri nisbətən uyğun olan ölkələrə gedirlər, istirahət edirlər. Bizdə isə sərhədlər bağlı, hotellər kifayət qədər yüksək qiymətlidir. Ən məşhur blogerlərə belə qrantlar verilsə, turist cəlb etmək çətin olacaq”.

T.Abbaslı onu da qeyd edib ki, bu məsələdə şəffaflıq olsa, daha yaxşı olar: “Başqa məsələ də var ki, deyirlər ki, xarici bloqerlərə verilən qrantlar öz bloqerlərimizə verilsin. Amma bu zaman da həmin blogerlər daxili auditoriyaya müraciət edirlər. Siyahıda kimlər var, bilmirəm. Yaxşı olar ki, hansı blogerlərə veriləcəyi, izləyicilərinin nə qədər olması, hansı kontentlər üzrə işləmələri açıqlanmalıdır.

Bunları bilsək, daha rahat danışa bilərdik. Bundan başqa maraqlı olan budur ki, məbləğ qarşılığında turist artımı nə qədər olub, ölkəmiz nə qədər tanınıb? Bütün bu məsələlər şəffaf olsa, daha aydın fikir demək olar nəinki ümumi qərarları demək… Yenə qeyd edirəm vəsaiti özümüzün yerli turizm şirkətlərinə sərf edib, dəstək versək, kənd turizmin inkişafına yönəltsək, sərhədlərin açılmasına çalışsaq, daha faydalı olar, nəinki xaricilərə yedirtmək...” /Pravda/