Baş dəmiryolçu haqqında ilginc iddialar... - Belə deyirlər...

Baş dəmiryolçu haqqında ilginc iddialar...
"Azərbaycan Dəmir Yolları" QSC-nin yeni rəhbəri Cavid Qurbanovla bağlı redaksiyamızın ünvanına ilginc faktlardan ibarət məlumat daxil olub. Dia.az həmin məlumatı olduğu kimi təqdim edir.

Məlumatı ötürən şəxs Cavid Qurbanovun fəaliyyəti, hətta onun həyat tərzini qaranlıq və qorxulu adlandırıb. Həmçinin mənbə Cavid Qurbanov haqqında Kəlbəcərdə orta məktəbdə oxuduğu vaxtdan bu günədək sürdüyü həyat tərzi ilə bağlı yazır:

"Baş dəmiryolçunun Kəlbəcərdə orta məktəbdə oxuyarkən bilik və bacarığı orta səviyyədən aşağı olub. Atası Qəmbər Qurbanovun Vəzirov dövründə Kəlbəcər rayonunun Xalq Deputatlar Soveti-nin sədri olması ona ali təhsil ocağını bitirməkdə kömək olub.

Hələ o vaxtkı Şamxor rayonunun Seyfəli kəndində dayıları və xalaları hesabına "hörmətlə" hərbi xidməti başa vuran yoldaş Qurbanovu sonradan Əbdülrəhman Vəzirovun Azərbaycan MK-nin birinci katib təyinatı və Qəmbər Qurbanovun birinci katiblə yaxın qohumluğu onu ilk vəzifəyə gətirib. Maştağa qəsəbəsində qaraj müdiri kimi çalışan Qubanov o vaxt işlədiyi yerdə "yeyən" müdir kimi ad çıxardıbmış.

Ayaz Mütəllibovun hakimiyyəti dövründə isə onun bayrağı altına keçən Cavid Qurbanov Maştağaya Azərbaycanın birinci prezidentinin xatirinə "qaynana" yolu çəkdirir. Bununla da münasibətlərini Mütəllibovla "yoluna qoyan" Cavid Qurbanov ilk xalını qazanır.

Cavid Qurbanov mərhum dövlət başçısı Heydər Əliyev dönəmində də "xüsusi bacarığı" sayəsində mühüm post tutub. Lakin məlum olduğu kimi mərhum prezident o vaxtkı "Azəravtoyol" Dövlət Şirkətinin prezidenti Cavid Qurbanovu tutduğu vəzifədən uzaqlaşdırıb.

Özü də mərhum dövlət başçısının Cavid Qurbanovla bağlı fərmanında bu şəkildə yazılıb: "Cavid Qəmbər oğlu Qurbanov işdə yol verdiyi və vəzifəsindən sui-istifadə etdiyinə görə Azərbaycan Respublikası "Azəravtoyol" Dövlət Şirkətinin prezidenti vəzifəsindən azad edilsin".

Bu cür fərmanın həbs ilə nəticələnəcəyini düşünən Cavid Qurbanov canını qurtarmaq üçün Rusiyaya qaçıb. Bu müddətdə Rusiyada gizlənən yoldaş Qurbanov Mahir Cavadovla və onun yaxınları ilə sıx əlaqələr qurub.

Sonda Cavadovlarla qurduğu planların baş tuta bilməyəcəyini anlayan Cavid Qurbanov yenidən kanallarını işə salaraq bu dəfə başqa vasitəçilərlə mərhum prezident Heydər Əliyevdən əfv diləyib və bağışlanıb. Bundan sonra isə tezliklə varidat sahibi olan Cavid Qurbanov ölkədəki oliqarx-məmurlar sırasına qatılıb.

"Azəryolservis"dən "Azərbaycan Dəmir Yolları" QSC-nin rəhbərliyinə gətirilən Cavid Qurbanov yeni vəzifəsindən narazıdır və buna görə də köhnə müdiri Ziya Məmmədova savaş açıb.

Bunun üçün "kisənin" ağzını açan Qurbanovun bir çox mətbuu orqanlara pul paylamaqda xəsislik etmədiyi bildirilir. Mənbə növbəti dəfə həmin mətbuu orqanların adlarının da redaksiyamıza göndəriləcəyini vurğulayır".

Müəllif dia.az-a göndərdiyi məqalədə həmçinin qeyd edir ki, Cavid Qurbanov hazrıki durumundan heç də razı deyil və onun daha yüksək məqamlarda gözü var: "Baş dəmiryolçu öz yaxınlarına baş nazir olmaq arzusunu gizlətməyib və əməyinin yüksək səviyyədə qiymətləndirilmədiyindən davamlı olaraq şikayət edir..."

İddia olunanlarla bağlı  qarşı tərəfi də dinləməyə hazırıq...
Tarix: 16-07-2020, 10:17
Xəbəri paylaş


Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman

Sağlamlıq

Maraqlı

Maraqlı